O persoal do servizo de recollida de residuos sólidos urbanos da Coruña anunciou que continuarán cos paros previstos ao non producirse avances na negociación coa empresa. Así o manifestou o portavoz do comité de Empresa, Alfonso Seijo, tras manter este venres unha reunión coa patronal para pór solución á folga “intermitente e indefinida“.
A mesma foi iniciada o pasado 24 de xuño, promovida pola organización sindical maioritaria no comité, o Sindicato de Traballadores de Limpeza (STL), con motivo de “despedimentos inxustificados”, “externalización de servizos” e “incumprimentos” do convenio. O colectivo relatou que tras unha longa reunión — que se estendeu ata as 21,30 horas — a postura da empresa “segue inmóbil en todos os aspectos”.
Sinalan que tras “moitas propostas e intentos”, puxeron sobre a mesa desconvocar a folga e os paros para empezar “mañá mesmo” — en referencia a este sábado — a negociación dun novo convenio. Tras solicitar un receso, explica o comité, a patronal traslaoulles que descoñecen se “poden facer iso” e que teñen que “consultalo co Concello”. “Así que seguiremos cos paros convocados porque entendemos que non é o Concello o que ten que dicir iso“, afirman, insistindo en que “o que ten que facer” o Consistorio é “facer cumprir á empresa os pregos”.
“En que quedamos? Inés Rey di que temos que arranxar entre sindicato e patronal e agora a patronal di que ten que falar co Concello”, denuncia o comité. Aseguran así que continuarán cos paros anunciados e que esperan recibir noticias da patronal entre o luns e martes próximos, “unha vez consulten co Concello”. Os seguintes paros están previstos para este sábado 13 e os días 25, 26 e 27 de xullo.
REDUCIR O RECIBO LIXOS
Mentres, a alcaldesa da Coruña, Inés Rey, anunciou que o goberno local estuda reducir o recibo de lixos que paga a cidadanía ante “situacións excepcionais como esta”, na súa opinión, “unha non folga”. Fíxoo nunha rolda de prensa na que volveu a esixir a Prezero “que tome todas as medidas que estean na súa man” para solucionar este conflito e reiterou que van “seguir tramitando as sancións correspondentes á empresa por incumprimento do contrato”.
Sobre a posibilidade de declarar emerxencia sanitaria para contratar a outra empresa que desempeñe o servizo, a rexedora explicou que o Consistorio está “a estudar que requisitos esíxense”. “Na vez anterior que se decreta o estado de emerxencia sanitaria non existía unha folga oficial, era unha folga de brazos caídos e había moitísimo máis lixo na rúa, desbordaba por toda a cidade” , explicou.
PROTESTAS
Doutra banda, a Federación Unión de Comercios Coruñesa (FUCC) remitiu senllos escritos ao Consistorio da Coruña e á Xunta para reclamar que se solucione a situación. “Hai un problema de saúde, un de contaminación ambiental, risco de caídas e un feísmo horrible, ademais dunha perda económica”, denunciou o presidente da FUCC, José Luís Boado, en declaracións a Europa Press.
“O Concello é quen ten que tomar medidas“, instou. No entanto, explicou que pediron ao Executivo autonómico a que “intermedie porque é un tema de saúde pública e de medioambiente”.
Na mesma liña, asociacións veciñais, colectivos e plataformas de veciños da cidade herculina manifestaron o seu “profundo malestar ante a inacción e despreocupación mostradas polo goberno municipal” neste conflito. Por iso, convocaron unha concentración o vindeiro venres, día 19, ás 20,00 horas na Praza de María Pita para esixir que se declare “xa o estado de emerxencia sanitaria”.
