A subdelegada do Goberno na Coruña, María Rivas, presidiu este acto de  condena e de dor por este crime, que cualificou de inaceptable. Nas súas palabras, remarcou que “cada muller que é vítima dunha agresión, dun homicidio ou de calquera manifestación desta violencia fainos retroceder como democracia e como sociedade libre”. E reiterou o compromiso inquebrantable do Goberno pola defensa da igualdade e dos  dereitos e a seguridade das mulleres: “debémosllo a Mercedes e debémosllo ás máis de 5.400 mulleres que hoxe en Galicia están baixo a protección do sistema de seguimento policial viogen”

Antes de gardar o minuto de silencio, María Rivas trasladou as condolencias e o afecto en nome propio e do Goberno á familia de Mercedes, acompañada por traballadores e traballadoras da Delegación do Goberno e por integrantes das forzas e corpos de seguridade do Estado. Entre eles atopábase o xefe superior de Policía de Galicia, Ramón Gómez; e o tenente coronel da Comandancia da Garda Civil da Coruña, Jorge Bodelón. Tamén asistiron a xefa da Unidade de Coordinación contra a Violencia de Xénero da Delegación, María Debén, e a concelleira de Benestar social, Participación e Igualdade do Concello da Coruña, Nereida Canosa, e a concelleira de Infraestruturas do mesmo Concello, Noemí Díaz.

A Delegación do Goberno contra a Violencia de Xénero cualificou esta mañá o crime de Mercedes Ríos, de 74 anos, como crime machista, o que o converte no 69 cometido en Galicia dende o ano 2003.

Con Mercedes, son 7 as mulleres asasinadas polas súas parellas ou ex parellas no que vai de ano en España. Desde o inicio das estatísticas en 2003, 1.272 mulleres foron asasinadas en España por crimes machistas. “Cada un deses nomes reafirma o compromiso deste Goberno pola erradicación da violencia gratuíta e sen sentido que sofren as mulleres só polo feito de ser muller”, remarcou a subdelegada.

O Ministerio de Igualdade, a través da Delegación do Goberno contra a Violencia de Xénero, quere lembrar que o teléfono 016, as consultas en liña a través do email 016-online@igualdad.gob.es, a canle do WhatsApp no número 600 000 016 e o chat en liña, accesible desde a páxina web violenciagenero.igualdade.gob.es/, funcionan as 24 horas, todos os días da semana. No 016 pódese pedir asesoramento sobre os recursos dispoñibles e os dereitos das vítimas de violencia de xénero, así como asesoramento xurídico de 8 h a 22 h todos os días da semana, con atención en 53 idiomas e un servizo adaptado a posibles situacións de discapacidade.

 

DECLARACIÓN DE SÁNCHEZ

O presidente do Goberno, Pedro Sánchez, trasladou a súa “repulsa” tras confirmarse o caso unha muller de 74 anos asasinada o pasado venres na Coruña, presuntamente a mans do seu marido, e pediu “unidade, recursos e firmeza” para loitar contra a violencia de xénero. “Todo o meu agarimo para a familia e amigos da muller asasinada pola violencia machista na Coruña”, expresou Sánchez este luns nunha mensaxe publicada na súa conta da rede social ‘X’.

Ademais, o presidente do Executivo insistiu na importancia de pór recursos para loitar contra a violencia machista e conseguir unha “sociedade xusta”. “Unha sociedade xusta e avanzada é incompatible coa violencia de xénero. Unidade, recursos, repulsa e firmeza fronte a esta violencia estrutural. Se es vítima, chama ao 016”, subliñou.