Acolleu onte o Ágora unha importante asamblea dos propietarios integrantes da Xunta de Compensación do API Q28 Parque de Oza, para analizar, avaliar e finalmente aprobar, o Plan de Reforma Interior (PERI) e o documento ambiental que permitirán, ao fin, rematar urbanisticamente o barrio do Castrillón coa construción de 1.000 novas vivendas.
Arredor duns 150 propietarios do chan (entre particulares -moitos deles veciños da zona-e o resto dos que conforman o API Q28 Parque de Oza, isto é, Aliseda, a Fundación Juana de Vega, a Sareb, o propio Concello da Coruña e varias mercantís) puideron coñecer, da man do equipo técnico redactor, os pormenores dos documentos urbanísticos (PERI e Avaliación Ambiental Estratéxica).
Agora, unha vez referendados polo plenario da Xunta de Compensación, pasarán ao Concello para que dea comezo a súa andaina. O primeiro será o traslado á Consellería de Medio Ambiente da Xunta de Galicia do documento ambiental para que o seu analise e exposición pública nos prazos fixados por lei e a súa devolución entón ao Concello co seu plácet.
Destacan que o proxecto respecta con exactitude a edificabilidade fixada para ese ámbito no Plan Xeral de Ordenación Municipal do 2013, 136.704,50 metros cadrados, e que incrementa, iso si, o chan destinado a uso e dominio público, ao que destina máis do 63% do chan.
Un funicular
Nos dous estudos presentados, ofrécense solucións para responder as dificultades da propia orografía do terreo nalgúns puntos. Así, proponse un elemento mecánico a modo de funicular ou ascensor inclinado que conectará a rúa Montes con Antonio Ríos-pois o desnivel entre ambas as rúas é de máis de 16 metros- e unha rampla en espiral entre a rúa Montes e o límite do IES de Monelos para dar accesibilidade a ese punto.
Os dereitos urbanísticos e as cesións
Os propietarios integrantes da Xunta de Compensación API Q28 Parque de Oza confían así en poder ao fin exercer os seus dereitos edificatorios tendo en conta que levan máis de dúas décadas esperando por iso. E iso adiantando de maneira altruísta todas as cesións de chan previstas no plan; espazos e infraestruturas dos que gozan desde hai moitos anos todos os habitantes do Castrillón: máis de 55.000 metros cadrados convertidos no Parque de Oza, 5.000 m2 sobre os que se asenta o Centro Deportivo que alberga a piscina municipal ou as rúas abertas ou completadas: 3.600 m2 para a apertura de tramos na rúa Antonio Ríos, 3.300 m2 para a Avda. da Concordia e 4300 m2 para Casanova de Eirís. A todo iso súmanse 840 m2 cedidos, tamén, para a ampliación do Instituto de Monelos.
Máis novas do Castrillón
En marcha as obras de humanización da praza José María Hernansáez, no Castrillón
A veciñanza do Castrillón coñece o proxecto da urbanización das 1.000 novas vivendas
A Xunta de Compensación “Parque de Oza” presenta o borrador do PERI da urbanización do Castrillón
