O Concello da Coruña iniciou a segunda fase da reurbanización de San Andrés, coa intervención entre Santa Catalina e a praza de Pontevedra.

A alcaldesa, Inés Rey, supervisou esta mañá os traballos e celebrou que “moi pronto a rúa recuperará a súa configuración orixinal de bulevar”.

A rexedora estivo acompañada pola concelleira de Infraestruturas e Mobilidade, Noemí Díaz e polo concelleiro de Urbanismo, Rehabilitación e Vivenda, Fran Diaz.

Rey sinalou que a rúa “gañará espazo para a cidadanía, máis visibilidade para os comercios e melloras para as persoas”. Nesta segunda fase executaranse as obras de canalización e pavimentación no tramo final da rúa, entre Santa Catalina e a praza de Pontevedra.

Por iso, esta mañá cortouse ao tráfico rodado o acceso a San Andrés desde a praza de Pontevedra e Juana de Veiga, desde onde só poderán circular os autobuses en dirección ao intercambiador da praza.

Noutra orde de cousas, o consistorio fixo público este martes a listaxe provisional de persoas beneficiarias das bolsas comedor para o próximo curso. En total concedéronse 2.313 solicitudes do total de 4.946 recibidas. Agora abrirase o período de alegacións.