A subdelegada do Goberno na Coruña, María Rivas, emprazou á Xunta a “definir” como abordar o pago de axudas aos mariscadores e mariscadoras da ría do Burgo mentres non poidan faenar, á espera de que a cría alcance a talla legal, tras as obras de dragado. A preguntas dos xornalistas, nun acto na Coruña, trasladou a “interlocución permanente e directa” co sector, ademais de incidir no “compromiso do Goberno” para colaborar nesta materia.

Non entanto, insistiu en que a “competencia” corresponde á Xunta. “Ten que definir o como, cando e canto vai custar isto”, engadiu. “Estamos a esperar a que a Xunta nos diga que é o que vai facer e que é o que nós podemos achegar, é a autoridade con competencias”, apostilou ao ser preguntada polas demandas do colectivo.