O Concello da Coruña habilitou este martes a consulta pública previa sobre o proxecto da modificación da ordenanza reguladora dos procedementos para a intervención e control na execución das obras, implantación de instalacións e actividades ou servizos, consulta que estará aberta ás achegas e suxestións da cidadanía ata o próximo 3 de setembro.

Con esta iniciativa, o goberno local dá o paso previo á actualización da ordenanza municipal que rexe a concesión de licenzas, aprobada no pleno municipal no ano 2014, e que agora debe adaptar o seu contido ao estipulado na vixente lexislación urbanística.

Neste sentido, a modificación da ordenanza ten como principais obxectivos a posta en marcha de procedementos que axilicen os trámites administrativos.

“Incluíndo a intervención de entidades de certificación de conformidade municipal debidamente constituídas, autorizadas e rexistradas, en expedientes de actividades e obras, excluíndo dos últimos cando se trate de obras a realizar en inmobles catalogados no Plan Xeral e en todo o ámbito do Plan Especial de protección e reforma interior da Cidade Vella e a Pescadería”, engade.