Un estudo con respaldo da Deputación da Coruña analiza, con escavacións en xacementos, a ampla presenza do Exército romano na provincia da Coruña. Trátase de ‘Roma no Finis Terrae’, un proxecto de investigación que busca profundar no coñecemento sobre a presenza dos militares romanos nos confíns do continente europeo.
Financiado pola Deputación da Coruña, a través do departamento de Patrimonio e dirixido desde a Universidade de Salamanca, coa participación da empresa Tempos Arqueólogos e o colectivo de investigación Roman Army, o equipo escavou en dous importantes xacementos. Trátase do castro e o campamento de Santa Baia, na Laracha, e a fortificación do Castrillón, en Touro, segundo se expuxo na presentación con presenza do deputado de Patrimonio, Xosé Penas, e tres dos membros do equipo.
En concreto, o director do proxecto, José Manuel Costa-García, profesor de Arqueoloxía na Universidade de Salamanca; o director arqueolóxico Francisco Alfonso, doutor en Historia, Xeografía e Historia da arte pola Universidade de Santiago de Compostela e o responsable de divulgación, Manuel Gago, xornalista, escritor e profesor asociado na Facultade de Ciencias da Comunicación da USC.
Penas asegurou que o organismo provincial busca, con iso, “visualizar e potenciar” o patrimonio existente, mentres que os seus responsables incidiron en que o proxecto aposta por achegar á cidadanía, dunha maneira visual, os resultados de investigación en xacementos arqueolóxicos efémeros, por ser campamentos temporais. A investigación continuará no xacemento de Cornado, en Negreira, e no de Cova do Mexadoiro, en Trazo.
Os analizados son posteriores a outros coñecidos como os de Sobrado dos Monxes, na Coruña, ou os localizados en Ourense. “Lugo xa levaba un século funcionando”, dixo José Manuel Costa sobre a presenza dos romanos nesta cidade e ao situar os estudos abordados neste traballo. “É unha arqueoloxía moi complexa porque deixan poucos restos tras de si”, engadiu para indicar que se facía unhas décadas se coñecían só tres sitios arqueolóxicos relacionados co Exército romano “agora falamos de 33”. “Temos indicios de que na provincia da Coruña estiveron con campamentos moi grandes, 6.000 ou 7.000 persoas, e o obxectivo é entender por que, cando estaban aí, como construíron”, resumiu.
