O portavoz do grupo municipal do PP no Concello da Coruña, Miguel Lorenzo, avanzou que apoiarán a moción que o BNG presentará ao próximo pleno municipal na que se solicita a suspensión do convenio co fondo de investimento europeo Gingko para urbanizar As Xubias.
Sobre o mesmo, e despois de que a alcaldesa da Coruña, Inés Rey, apelase ao diálogo tras as críticas da oposición e de veciños, Lorenzo volveu a pedir “transparencia”. “Non me gusta como o fixeron, sen coñecemento dos partidos políticos”, dixo sobre o convenio subscrito. Do mesmo, incidiu no feito de que o concello se comprometa a “excluír todos os ámbitos obxecto do convenio da modificación puntual do Plan Xeral de Ordenación Municipal (PXOM) as zonas que pertencen a ese fondo investidor”.
Respecto ao texto do BNG, explicou que o PP presentará unha emenda de adicción para concretar non só o futuro da zona de Oza ao Materno, senón tamén do hospital á ponte da Pasaxe. “E tamén respecto da intervención de Isabel Pardo de Bera que foi asesora deste fondo de investimento e que a ían a nomear directora do plan estrategico municipal, creo que é incompatible”, dixo sobre a exsecretaria de Estado de Transportes.
A alcaldesa da Coruña disposta a falar co PP tras o veto do BNG ao plan urbanístico das Xubias
DENUNCIA FALTA DE EXECUCIÓN
Xa de cara ao pleno deste xoves, apelou a facer unha “reflexión” sobre como está a funcionar a contratación no consistorio. “O interventor di que hai un incumprimento legal permanente en materia de contratación e que os reparos suspensivos son a que moitos dos servizos non foron licitados”.
Por outra banda, manifestou que “en 2023 quedaron sen gastar 63,6 millóns do orzamento total”. “Os coruñeses estamos a pagar moito máis do que recibimos”, engadiu ao argumentar que falta “execución do orzamento municipal”.
Máis novas
