Esta semana, a 27 edición de Viñetas desde o Atlántico, o Salón Internacional do Cómic da Coruña, organizado polo concello herculino, regresa á cidade xunto con novas iniciativas no marco de ‘Viñetas Inclusivas’. A programación comezará este martes.
Desde o día 24 ata o 27 de setembro, ás 18.00 horas, terán lugar as visitas guiadas a cargo de Tonecho Otero, do Comité Cidadán Antisida da Coruña-Casco. Será tanto a través das exposicións monográficas de Marc Torices e Susana Martín, como da Expofanzine e a mostra bibliográfica dos Premios Castelao que se sitúan na sala de exposicións de Palexco.
Por outra banda, o mércores día 25, ás 18.30 horas, a Biblioteca Municipal Infantil e Xuvenil de Durán Loriga acollerá o taller interxeracional ‘Viñetas para todo o mundo’, en colaboración con Aspronaga e Dimacor, da man da xornalista especializada en educación e inclusión Sonia Hermida. O día 27 presentarase o fanzine ‘Nai dos desterrados’, na Biblioteca Municipal de Durán Loriga.
