Representantes da Asociación de Dano Cerebral da Coruña (Adaceco) e de administracións asistiron este mércores á colocación da primeira pedra do novo centro desta entidade, que estará situado no barrio de Eirís. O novo inmoble, que estará dispoñible antes de que finalice 2026, será centro de día e terá atención ambulatoria para 130 usuarios, con terapias pautadas tres veces á semana.

O acto contou coa presenza, entre outras autoridades, da alcaldesa da cidade herculina, Inés Rey; o delegado do Goberno en Galicia, Pedro Blanco; a deputada provincial Yoya Neira; e a delegada da Xunta na Coruña, Belén Docampo; así como do presidente de Adaceco, Juan Luís Delgado, e do xefe de comunicación de Inditex, Raúl Estradera. Todos eles coincidiron en incidir na importancia deste novo centro de cara a mellorar a calidade das persoas con dano cerebral e das súas familias. Só en Galicia estímase que hai 7.000 afectados, deles algo máis de mil na área sanitaria da Coruña-Cee.

Así, a alcaldesa fixo fincapé no “compromiso” das administracións de “visibilizar” aos afectados por esta enfermidade e ás súas familias. Na mesma liña, a deputada provincial lamentou que se trate dun colectivo “invisible, tanto no ámbito dos social como sociosanitario”. Pola súa banda, Pedro Blanco destacou a “preocupación” por parte do Goberno central tanto polas persoas con dano cerebral como polos seus coidadores, “un elemento fundamental”.

Na súa intervención, o presidente de Adaceco agradeceu a cesión do Concello da Coruña da parcela para construír este edificio e a doazón de traballadores de Inditex que “cobre case o 50 % do importe do proxecto”. Neste sentido, o xefe de comunicación desta empresa concretou que o diñeiro “provén das achegas realizadas polos empregados no mercadillo de Nadal” e recalcou as iniciativas da compañía “enfocadas á protección da vida e o benestar das persoas”.