O presidente da Xunta, Alfonso Rueda, anunciou este luns a creación dunha liña de préstamos dotada con 10 millóns de euros parcialmente reembolsables, pola que as empresas da provincia da Coruña poderán optar a axudas e créditos de modo conxunto para o financiamento de iniciativas para potenciar e crear postos de traballo, a innovación e a posta en marcha de novas iniciativas empresariais.

Na rolda de prensa posterior á reunión semanal do seu Goberno, Rueda detallou que a medida, en réxime de concorrencia competitiva, inscríbese no marco do ‘Fondo de Transición Xusta’, polo que o Goberno galego destinará máis de 100 millóns de euros no período 2021-2024 a mellorar os procesos empresariais e a modernizar a industria na provincia da Coruña, unha do nove máis afectadas en España polo proceso de descarbonización. “O obxectivo é mitigar os efectos prexudiciais do peche das centrais das Pontes e Meirama”, indicou.

A Xunta explicou que estes préstamos se conceden a través do Igape e Inega e permiten financiar proxectos empresariais, fomentar a descarbonización nos sectores tractores de Galicia, implantar novas industrias, mellorar a eficiencia enerxética dos polígonos industriais ou crear un polo de innovación tecnolóxica en enerxías renovables.