Mariscadores e mariscadoras da ría do Burgo reclamaron, unha vez máis, “tanto ao Executivo central como á Xunta” o pago de axudas mentres non poidan faenar tras a finalización das obras de dragado, á espera de que crezan as crías. Fixérono nunha nova protesta ante a Delegación do Goberno en Galicia.
“Que poñan fin a esta problemática tan alongada no tempo que está a asfixiar cada vez máis a economía e a vida dos profesionais que viviamos do marisqueo na ría do Burgo”, esixiu o portavoz do colectivo, Manuel Baldomir.
Neste sentido, expuxo que “a día de hoxe o ingreso que se debe do último trimestre, febreiro, marzo e abril, aínda non chegou á conta“. “Seguimos á espera, nin ingreso do que se nos debe nin vistas de querer solucionar esta problemática”, lamentou.
Respecto da postura da Unión Europea, Baldomir explicou que lles foron enviados os informes elaborados pola Confraría de Pescadores da Coruña respecto ao proceso de dragado. “Esperemos que, en breve, poidan porse en contacto co Goberno de España a ver por que se adxudicou unha obra con irregularidades e díganlle que entre en razón e dean unha solución aos traballadores“, indicou.
