A primeira edición do Encontro de Música Aberta, organizado pola Xunta de Galicia e a Fundación Paideia Galiza, terá lugar o vindeiro martes 6 de novembro na sede dos Estudos Mans, na Coruña, co obxectivo de conectar o sector musical galego con todos os públicos mediante unha xornada centrada na formación, o debate e o networking.
Baixo o lema ‘Estamos en sintonía’, participarán na iniciativa o artista Abraham Cupeiro, co seu singular espectáculo ‘Resoando no pasado’ e unha masterclass de creación de instrumentos, e o dúo Soleado, novo grupo de fusión indie-folk formado polo guitarrista e compositor de Vetusta Morla Juanma Latorre e a cantante e compositora Ester Rodríguez, que ofrecerá un showcase comentado. O diálogo chegará da man de Laura Iturralde, quen moderará a conversación creativa ‘Show Must Go On!: da teoría á práctica dos espectáculos en vivo’, xunto aos artistas Marta Verde, Teresa Tresandí e Víctor García, Aka Death Whistle. Ademais disto, o Encontro de Música Aberta arrincará xa ás 7.00 horas coa emisión en aberto e con público en directo do programa de Radio 3 Hoy empieza todo, conducido pola xornalista Irene Valente.
O Encontro de Música Aberta nace coa finalidade de impulsar a profesionalización da actividade musical emerxente en Galicia e de promover os novos talentos, ademais de apoiar o potencial dos profesionais como axentes de transformación social. Busca tamén favorecer a participación e a expresión das novas figuras do sector, mellorando os seus coñecementos profesionais e sobre a industria musical da nosa contorna, e promover as oportunidades de diálogo de artistas noveis con axentes, promotores e outros perfís profesionais relevantes da industria.
