A entidade Defensa do Común instou á Xunta a impor á familia Franco unha sanción dun millón de euros por non abrir a Casa Cornide e anunciou unha nova marcha en defensa da devolución do inmoble ao patrimonio municipal da Coruña. Faino despois de que a Xunta anunciase unha proposta de sanción aos herdeiros do ditador de 3.000 euros por non abrila.
Nun comunicado, lembra que tras a declacación da vivenda, propiedade da familia Franco, como Ben de Interese Cultural (BIC) en maio de 2023, os propietarios deben permitir “a súa visita pública gratuíta un número mínimo de catro días ao mes durante, polo menos, catro horas ao día”. O decreto, puntualiza, que a visita “non se estenderá aos espazos que constitúan domicilio particular”.
Segundo explica Defensa do Común, a Xunta permitiu á familia Franco “todo tipo de manobras” e “entrar nunha dinámica de alegacións continuadas” para non abrir ao público o inmoble, “a última alegando que é un domicilio particular” tras ter ” tempo para realizar unha inspección e comprobar que hoxe a Casa Cornide non é un domicilio particular e que alí non vive ninguén”.
Esta “permisividade” do Executivo autonómico, engade, reflíctese en considerar “a súa continuada negativa a cumprir a lei” como unha falta leve e iniciar un expediente de sanción “cunha cantidade ridícula de 3.000 euros”. Así, insta á Xunta a cualificar a infracción como “moi grave” e imporlle un millón de euros de multa.
A entidade anuncia, ademais, a realización do V Marcha cívica pola devolución da Casa Cornide “no prazo aproximado dun mes”.
