- Xornada 14 – Deportivo 1 – Eibar -0
- O Depor gaña un partido no fío do final cun fermoso gol de Mario Soriano.
- Décimo cuarto partido no que vai de tempada (4V 4E 6D).
— — —
Tardou en chegar, pero onte por riba do minuto noventa, apareceu en Riazor o sorriso de Mario Soriano despois de marcar un dos goles da tempada para o Depor. Un Mario que segue en proceso evolutivo adaptándose a unha posición máis afastada da portería e con moita máis influencia na saída de balón. Onte viuse que o Dépor quere chegar á portería rival con transicións moi rápidas e renunciando ao típico músculo no medio campo, xa que Villares e Mario son eses homes de destrución e de creación, nun equipo que quere aproveitar a velocidade das bandas de Mella e Yeremay.
Unha vitoria, a de onte, que rompe o modo no que viñan sucedendo as cousas dende o principio da tempada: é a primeira vez que o equipo suma dúas vitorias consecutivas, é a primeira vez que o equipo marca un gol ao límite do tempo mentres que nos partidos do Huesca ou do Burgos recibía eses mesmos goles en contra; freouse a sangría de goles en contra (11 goles nos sete primeiros encontros por 7 goles nos últimos sete encontros) e rompeuse tamén a racha de dous meses sen gañar na casa.
Vitoria reparadora que mellora a dinámica e rechea o depósito da tranquilidade para rematar ben o ano.
Pódese dar por rematado o período de adaptación á 2ª División e pódense sacar varias conclusións.
A primeira é que os recén ascendidos xunto co Dépor están nunha marxe de 4 puntos (Castellón, 20 puntos; Málaga 20 puntos; Córdoba, 16 puntos), aínda que todos eles cun partidos menos que o Dépor, pero nunha zona da clasificación que te permite mirar case coa mesma distancia ao playoff e o descenso.
A segunda é que o equipo aséntase sobre un once tipo e amosa pouco recambio útil dende o banco, xa que só Cristian Herrera ou Bouldini entran a xogar con certa constancia, aínda que con pouco impacta polo de agora.
E, por último, xogadores como Patiño, Hugo Rama, Gauto ou Davo non están a demostrar os motivos de fichalos ou mantelos na plantilla final, polo que tocará facer crítica no próximo mercado de inverno.
- Miguel Barreiro Bugallo. Coruñés e deportivista no exilio mesetario. Sufrindo ó depor dende 1988. O que sei de fútbol, o Depor empéñase en negarmo. Firme defensor do fútbol de botas negras.
