O portavoz do colectivo de mariscadores da ría do Burgo, Manuel Baldomir, mostrou a sensación “agridoce” que lles deixou unha nova reunión sobre as axudas pendentes mentres non poden faenar. En declaracións tras o encontro, Baldomir queixouse da “sorpresa” de que non acudise ninguén por parte do Goberno central e tan só houbese representación da Xunta, en concreto coa directora xeral de Desenvolvemento Pesqueiro, Marta Villaverde, e a xefa territorial de Mar na Coruña, María Cancelo. O delegado do Goberno en Galicia, Pedro Blanco, trasladou hai un mes a vontade do Executivo central de completar cun 50 % adicional as axudas que aprobe a Xunta de Galicia para os mariscadores da ría do Burgo ata o seu retorno á actividade.

Respecto diso, Baldomir indica que estes cargos do Executivo galego confirman que “si é certo” que “están a manter negociacións” por parte do Goberno central coa Xunta para abordar as compensacións pola imposibilidade da actividade extractiva, pero “non saben como se pode realizar o financiamento que afirmou o señor delegado (do Goberno) ao patrón maior”. “Dinnos por parte da Consellería do Mar que a través de fondos ordinarios que é imposible”, explica ao tratarse obras de dragado, xa que eses fondos ordinarios están para “recuperar bancos marisqueiros, pero de forma natural, non causados por unha obra”, agrega.

“Non sabemos como pode ser isto”, quéixase. “Por unha banda, dinos o señor delegado que xa ten confirmación da Xunta de que se farán as compensacións ao 50 %; doutra banda, temos a resposta da Consellería do Mar dicíndonos que non saben como se poderá financiar, posto que a través de fondos ordinarios é imposible”, lamenta. “Por unha banda, temos as promesas do delegado de Goberno asumindo que o Goberno e a Xunta chegaron a un acordo para facer os pagos ao 50 %: pero, doutra banda, esta parte agre, a que a Consellería do Mar infórmanos de que si, é certo, que estiveron en negociación, pero que aínda non saben como se vai a poder afrontar, posto que non se pode facer a través de fondos ordinarios”, incide.

Ademais, denuncia que, “a día de hoxe”, débeselles o pago do último trimestre polas obras do dragado, “correspondendo aos meses de febreiro, marzo e abril”. Relata que “a xente está moi asfixiada economicamente”. “Había promesas do delegado do Goberno de que a finais do mes de outubro, principios de novembro, íase a realizar este cobro”, sinala, pero están “a mediados” de novembro “e aínda non se recibiu o cobro”. “Parece que todo o que nos di o delegado do Goberno queda en saco baleiro”, critica. Os mariscadores esperan que na próxima reunión, prevista para o 27 de novembro, acuda representación do Goberno “para poder explicar como son esas negociacións” e que non haxa “só promesas”.