Continúa activa por segunda fin de semana a folga dos conserxes das instalacións deportivas municipais. O Comité de Empresa, formado por membros da CIG, UGT e CCOO, mantén as mobilizacións ante a falta de concreción dos dereitos dos aproximandamente 80 traballadores e traballadoras municipais que coidan os nosos pavillóns e campos de fútbol.
Deste xeito, ducias de competicións, e sobre todo, centos de familias e deportistas, veranse afectadas polo peche das instalacións, que provocarán numerosos atrasos nas ligas de todas as categorías. Ademais, os servizos mínimos previstos para esta fin de semana son poucos, polo que tendo en conta que o seguemento da folga está a ser do 100%, a afectación será máxima. “Sabemos o dano que facemos á xente que vai facer deporte, e sentímolo moito, pero é a única maneira de defender o que é noso”, sinala o voceiro do comité, Xulio Ramil. “Levamos 3 anos pelexando, e as palabras están esgotadas. Chegamos ata onde podemos”.
Responsabilidade municipal
O colectivo de traballadores esixen o cumprimento do convenio colectivo e o pago o complemento de polivalencia. Para o Comité “toda a responsabilidade ao Concello”, unha vez que “a disposición da empresa Outsourcing (Grupo Social Once) era de pagar, ata que o Concello lle dixo que non lle ía abonar esa parte”.
Así se ratifica co sucedido esta mesma mañá de xoves 21 de novembro. Celebrábase a conciliación previa ao xuízo, á que asistiron representantes dos 3 sindicatos, do comité e da empresa, faltando unicamente un representante do Concello. “Xa ves a vontade de arranxar o asunto…” lamenta un Ramil que lembra que a suba salarial xa estaba sinalada no acordo de investidura que asinou o BNG co PSOE, sendo así este outro dos incumprimentos do goberno socialista que provocan que o BNG non vaia acordar os Orzamentos de 2025.
A cousa vai para longo, pois estes conflitos colectivos adoitan tardar entre 4 e 6 meses, segundo o presidente do Comité.
Con todo, a semana que vén o Comité celebrará unha Asemblea para determintar como continúan as mobilizacións, tendo claro que as mobilizacións seguirán con toda seguridade.
