Na actualidade, en Galicia só hai 37 logopedas no sistema sanitario público. Unha cifra que chama a atención do Colexio Profesional de Logopedas de Galicia, que vén de propoñer o seu “Plan 2025-2030, 100 logopedas en 2030”. A entidade considera que como mínimo a “sanidade pública galega precisa de 100 logopedas para unha atención eficaz”, e con ese obxectivo elabora este plan que xa llo presentou á Xunta o pasado mes de setembro.
“Se o Sergas contrata 63 logopedas de aquí a 2030, pasaremos da ratio actual de 1 logopeda por cada 72.000 galegos a 1 logopeda por cada 27.000, unha proporción que melloraría a atención que demanda e esixe a cidadanía”, indicou Javier Bueno, vicepresidente do Colexio. “Os beneficios superarían con moito o investimento previsto nese plan a seis anos”, explica tendo en conta que os custos do plan 2025-2030 elaborado pola organización colexial elévanse a uns 8,5 millóns de euros, pero que o aforro estimado case multiplica por 1,5 esa cantidade. “No cálculo destes beneficios económicos directos, tivemos en conta, pola evidencia científica e a maior acessibilidade dos datos, os que se derivan fundamentalmente do aforro de custos por hospitalización en pacientes con patoloxías nas que o tratamento logopédico reduce os días ou evita o ingreso”, explicou Bueno.
Aumento da demanda, máis nas zonas rurais
“Nos últimos cinco anos, a demanda de pacientes atendidos creceu un 39 % na Área Sanitaria da Coruña e pasamos de 5 a 6 logopedas. Pasamos de 10 horas de atención media por paciente a 7 horas”, destacou o vicepresidente das logopedas galegas.
Pero é que ademais a situación supón unha clara discriminación para o pacientes que viven máis apartados dos hospitais de referencia pasan máis tempo na estrada que na consulta. É o caso de Olga Lopez, unha veciña de Malpica que recibe tratamento logopédico no CHUAC despois de sufrir unha afasia. Luis Pose, o seu marido, acompáñaa todos os días: “Facemos una hora de camiño para A Coruña e outra para casa. Dúas horas de coche para media hora de tratamento, que non é suficiente. Aínda se fose máis tempo ou algo máis preto… Aínda menos mal que vimos pola nosa conta. Coa ambulancia, tardaríamos toda a maña. Na casa, completamos o tratamento do hospital con outra media hora máis.”
Jaime Villar, veciño de Cee, acode a sesións de logopeda despois de que lle quedasen afectadas as cordas vocais tras unha operación. “Desprázome 115 quilómetros para unha sesión de media hora. Entendo, e coma min moita xente máis, que debería haber unha logopeda nos hospitais comarcais ou nos centros de saúde para evitar desprazamentos tan longos. É hora e cuarto de ida e outro tanto de volta. Dependendo da hora que toque a consulta, perdes a mañá e mesmo tamén a tarde”, pide.
