O Consello de Administración da Autoridade Portuaria da Coruña outorgou hoxe unha concesión á Asociación Galega de Fabricantes de Alimentos Compostos (Agafac) para a construción dun centro de seguridade alimentaria no porto exterior. Agafac, a través da súa sociedade de servizos Seguridade Alimentaria do Noroeste, investirá 500.000 euros na construción do centro, nun edificio de 250 metros cadrados distribuídos en dúas plantas. O prazo de execución estímase en nove meses, polo que poderá entrar en servizo a finais de 2025 ou a principios de 2026.

Por outra banda, xa respecto ao proxecto Coruña Marítima, o presidente da Autoridade Portuaria, Martín Fernández Prado, indicou que nas últimas semanas realizouse un intenso traballo por parte dos técnicos das seis administracións participantes. As conclusións principais deste traballo serán trasladadas á Comisión Coruña Marítima, coa previsión de que este órgano poida definir en xaneiro as liñas estratéxicas para a transformación dos espazos portuarios e ferroviarios.

“Cúmprese así a programación que estaba prevista, de cara a convocar no primeiro cuadrimestre de 2025 un concurso internacional multidisciplinar para definir o deseño global de todo o ámbito, tendo en conta tamén as achegas dos axentes sociais a través do Foro Coruña Marítima que se convocará nas primeiras semanas do próximo ano“, engade.