Vive a música tradicional un proceso de rexeración tremendamente interesan. Dende a sombra nesta cidade eternamente entregada á globalización, os barrios coruñeses non son alleos á revolución da música do país. Mentres as Tanxugueiras, Fillas de Cassandra, Mondras… abren as fronteiras da tradición a outros sons e conseguen traspasar o telón de grelos e levar a nosa música a outras latitudes, as entidades do país reviven a música de raíz.
Se ben a Coruña viviu sempre algo de costas á tradición (no rural galego nunha deixou de ser protagonista principal da escena musical), si que houbo e segue habendo entidades que gardan, comparten e espallan a nosa música, o noso canto e o noso bailes. Xacarandaina, Donaire ou a centenaria Cántigas da Terra son exemplos perfectos de como a Coruña é berce da nosa música, apesar de vivir sempre na sombra mediática.
O mesmo pasa coa A.C. Sondaquí, que este pasado sábado organizou un fermoso pasabares para recuperar os tradicionais Cantos de Taberna polo barrio de Monte Alto. Os músicos da entidade de diferentes xeracións (había gaiteiros dos 12 aos 60 anos, como o mítixo artesán Xosé Manuel Seivane) percorreron as rúas do barrio acompañadas polas pandeiretas e os tamborís, dándolle unha fermosa cor á noite sabatina.
Un cento de persoas seguía en clave de pasarrúas, á comitiva musiqueira, dende o San Martín, na Rúa Faro, ata o Gomes Gaioso, pasando pola sede da SD Marte e o Ansu, o Polvorín e o Sión de Valais.
A xornada rematou no comprometido centro social sito na rúa Marconi, convertindo o local nunha foliada digna da Fonsagrada, ateigada de rapazada de 20-30 anos que demostraron que a tradición está máis viva que nunca.
View this post on Instagram
