Os traballadores de Veolia Servizos Norte, empresa adxudicataria do servizo de mantemento dos hospitais da área sanitaria da Coruña-Cee, están chamados a participar nunha folga indefinida que arrincará ás 00.00 deste luns para reclamar a negociación do novo convenio.

A Consellería de Sanidade publicou este venres no Diario Oficial de Galicia (DOG) a relación de servizos mínimos, que constarán dun máximo dun traballador por centro e quenda.

Sanidade incide na necesidade de presenza de persoal e sinala que a determinación dos traballadores necesarios “realizarase pola empresa en coordinación coa dirección da área de saúde da Coruña e Cee”.

Entre outras cuestións, alude, en canto aos criterios a ter en conta, ao risco para os pacientes, os usuarios e traballadores, o impacto na actividade asistencial e o volume de poboación atendida.

Polo xeral, os servizos mínimos constarán dun traballador por hospital –Teresa Herrera, Abente e Lago, Oza e Virxe da Xunqueira de Cee– e quenda –mañá, tarde e noite–. A única excepción será a lavandaría, que non terá a ninguén pola noite.