O presidente da Deputación da Coruña, Valentín González Formoso, reuniuse co secretario de Estado de Transportes e Mobilidade, José Antonio Santano, ao que lle trasladou a importancia de axilizar os investimentos para modernizar a liña de tren Ferrol-A Coruña, electrificar a vía e garantir un trazado adecuado e tempos de conexión razoables. Así o fixo esta semana cando José Antonio Santano viaxou a Galicia para presentar no Pazo de Mariñán os últimos avances no Corredor Atlántico na comunidade galega.

Na reunión, analizaron o estado dalgunhas das obras estratéxicas que o Ministerio de Transportes financia na provincia da Coruña, como a autovía Santiago-Lugo (A-54); o novo acceso ferroviario ao porto de Punta Langosteira; e, entre outras, a conexión de tren ao porto exterior de Ferrol. Formoso destacou o compromiso do Goberno de España co Corredor Atlántico, con máis de 4.500 millóns de euros previstos en investimentos en Galicia ata 2030.