O Complexo Hospitalario Universitario da Coruña (Chuac) reforzará o persoal de seguridade en Urxencias tras a agresión a un enfermeiro e un vixiante por un paciente con problemas psiquiátricos. Así o informaron desde o centro hospitalario no que precisaron que tanto este servizo como o de Saúde Mental da área sanitaria da Coruña e Cee dispoñen dun protocolo clínico-asistencial de atención ás urxencias psiquiátricas en vigor, “acordado entre o Servizo de Urxencias e o Servizo de Psiquiatría e dispoñible para todos os profesionais na intranet”.
“Ademais, disponse de protocolos de actuación nas urxencias de saúde mental en pediatría e un protocolo de prevención do suicidio intrahospitalario”. “Por outra banda, o Servizo de Orde Interna e Seguridade tamén dispón do correspondente protocolo de actuación a pacientes axitados”, engade. Neste sentido, indica que o protocolo en vigor inclúe “o tratamento, a abordaxe e as medidas de seguridade a aplicar co paciente agresivo no servizo de urxencias”. “Todos estes protocolos están en vigor, sen prexuízo de que poidan seguir mellorándose e actualizándose”. Por outra banda, indica que “no momento actual, e á vista dos acontecementos do pasado luns, reuniuse de urxencia ao comité de seguridade e saúde e procedeuse, entre outras cousas, á revisión das actuacións e protocolos vixentes, a fin de detectar áreas de mellora”.
Na mesma liña, indica que “se acordou co Servizo de Urxencias o reforzo da presenza de persoal de seguridade na área de urxencias, iniciouse o correspondente informe dos técnicos de prevención de riscos laborais, activouse a análise sistematizada do suceso mediante a análise de causa raíz (ACR) e ofertouse apoio psicolóxico ao persoal do servizo de urxencias; así como asesoramento legal”. “O obxectivo de todas estas medidas é reducir ao máximo as posibilidades de que se produzan incidentes similares, maximizar a seguridade dos nosos profesionais e usuarios, e prestar a mellor asistencia á cidadanía”, recalca.
PROTESTAS
Pola súa banda, a Comisión de Centro do Chuac, que convocou para este xoves na porta de urxencias unha mobilización e unha asemblea co persoal, afirma que na reunión do comité de seguridade e saúde as delegadas de persoal solicitaron os protocolos. “Dixeron que ían estudar as causas do ocorrido”, indican nun comunicado no que asegura que pediron “medidas urxentes para garantir a seguridade dos profesionais”. Por outra banda, afirman que a asemblea será na rúa ao non facilitarlles, aseguran, unha sala “alegando que non había dispoñibles”. Ademais, sosteñen que a xerencia lles presentou “un protocolo de actuación en urxencias psiquiátricas do 2012, do que o persoal non tiña coñecemento, como quedou de manifesto no comité de seguridade e saúde”.
MEDIDAS
Esta Comisión esixe, ademais, “a aplicación de medidas sen máis demora ante a situación de desprotección na que se atopa o persoal” con protocolos para todos os profesionais, circuítos de atención definidos, incremento dos equipos de seguridade e espazos adecuados de atención aos pacientes de perfil agresivo en urxencias, entre outras actuacións. Desde a Sociedade Española de Urxencias e Emerxencias convocouse tamén protesta, a partir das 12.00 horas, non só na Coruña senón tamén noutras localidades de Galicia baixo o lema ‘Stop Agresións xa’ e ‘Por uns servizos de urxencias e emerxencias libres de violencia’.
