A familia de Yoel Quispe, o mozo apuñalado mortalmente na madrugada do día de Noiteboa de 2023 na Coruña, achegou novas probas para que se impute a dúas persoas máis “ás que sinalan testemuñas”, ademais do tres detidos acusados formalmente por Fiscalía por delito de homicidio.

“Serían cinco”, expuxo a nai do mozo, Maritza Yovana Gómez, con motivo dunha nova mobilización de achegados, este luns ante a Audiencia Provincial da Coruña.
Unha vintena de amigos e familiares pediron ‘Xustiza para Yoel’ con consignas como ‘O racismo mata, o Estado apóiao’, ‘Yoel, irmán, nós non te esquecemos’ ou ‘Yoel, presente, agora e sempre’. “O meu fillo era todo para min”, recalcou a nai ás portas da Audiencia coruñesa.

“Estiveron a pegarlle ao meu fillo cando estaba a sangrar”, expuxo para incidir en que estas dúas persoas ás que apuntan deben pasar a ser considerados investigados na causa. “Eran 11 contra un, atacaron ao meu fillo porque non podía defenderse, viña só, vese nas imaxes”, insistiu en liña coa postura que mantivo a familia desde que se produciron os feitos.

En relación a este caso, Fiscalía imputou formalmente delito de homicidio ao tres detidos, acusación á que se sumou no seu momento a familia que, no entanto, solicitou no marco da instrución máis probas ao entender que os feitos son constitutivos de asasinato.

A fase de instrución na que se atopa o caso pola morte de Quispe foi prorrogada por seis meses mentres proseguen as actuacións en relación ao mesmo. Por agora, hai unha persoa en prisión con outros dous en liberdade con obrigación de comparecencias.

Máis novas do caso Yoel

Prorrogada a fase de instrución pola morte de Yoel Quispe na Coruña na Noiteboa de 2023

Amigos e familiares de Yoel Quispe volven pedir “xustiza” nunha nova protesta nos xulgados

O tecido antirracista galego sae á rúa na Coruña para pedir xustiza para Henry e para Yoel

Detidas dúas persoas polo apuñalamento mortal de Yoel Quispe na Coruña