A familia do fotógrafo coruñés Francisco Pillado González (1892-1977) doou, case 50 anos despois do seu falecemento, toda a súa obra artística á Real Academia de Galicia (RAG), sendo agora de “acceso público para a comunidade investigadora e calquera persoa interesada na historia da fotografía en Galicia”. Tal e como trasladou a RAG nunha nota de prensa aos medios, a colección cedida pola familia á academia consta de 2.000 placas e negativos fotográficos, uns 100 positivos en papel, unha película e un visor estereoscópico.
Francisco Pillado González centrou o seu traballo artístico en fotografar a cidade da Coruña e á súa xente entre os anos 20 e 70 do século XX. Ademais, formou parte da Sociedade Fotográfica Coruñesa, onde foi “un dos máis destacados fotógrafos afeccionados”, chegando mesmo a ser vicepresidente. Influenciado polo pictorialismo, na súa obra destacan os escenarios urbanos da ‘cidade de cristal’ e de vilas próximas, como Corme ou Betanzos. En especial, fotografía “desde o respecto” retratos de “unha clase social distinta á súa”, como mariñeiros, lavandeiras ou agricultores, pois el pertencía a unha familia acomodada.
Así, os familiares de Francisco Pillado “pechan” un ciclo de proxectos coas fotografías do coruñés, no que destacan a exposición ‘Coruña, catro temas’, na que participou o fotógrafo José Caruncho; a colaboración no documental ‘Esquece Monelos’, de Ángeles Huerta; e ‘Só hai horizonte’, unha obra musical de Juan Vara con poemas de Xavier Seoane. Doutra banda, o Álbum de Galicia incorporou unha nova entrada: a das ‘Cantareiras de Cerceda’, Adolfina Casás Rama e a súa sobriña Rosa, dúas mulleres labregas e ‘cantareiras’ que elaboraban coplas de todo tipo e utilizábanas, entre outras cousas, para defenderse dos murmurios derivados da súa condición de nais solteiras.
