A Universidade da Coruña (UDC) emitiu un comunicado este venres no que avanza que “dará continuidade” aos traballos para contar coa súa propia facultade de Medicina, dado que o Consello de Goberno da Universidade de Santiago (USC) non asinou o acordo de descentralización do grao na súa reunión deste venres.
Na nota lamentan o ocorrido na reunión da universidade compostelá, que debía ratificar un acordo que contaba co rexeitamento frontal da facultade, as candidatas a reitoras, e o Consello de Estudantado. Ante esta situación, o propio reitor, Antonio López, decidía non someter a votación o acordo para “abrir unha vía de diálogo” coa Facultade que permitise a súa adherencia ao pacto. A pesar de que se amosaban optimistas e con “opcións reais” de que o acordo saíse adiante, o ocorrido esta mañá cámbiao todo para a universidade coruñesa.
“SEMPRE BUSCAMOS O ACORDO E O CONSENSO”
Fontes consultadas por Europa Press sinalan que non é posible un acordo sen unha das partes e lamentan “profundamente” a situación, destacando ademais que a universidade coruñesa, aínda con expectativas de contar co seu propio grao, foi o primeiro en ratificar o acordo de descentralización que supuña “pausar” estas inquedanzas. No comunicado, a UDC lamenta que se deixen “sen validez moitas horas de traballo para buscar un texto dialogado e consensuado” que ía permitir aplicar a descentralización “aproveitando todos os recursos do sistema sanitario e universitario galego”.
“Actuamos en todo momento con lealdade ao Sistema Universitario de Galicia (SUG) e respecto institucional polas institucións que o constitúen. Neste marco, dialogamos e buscamos o acordo e o consenso. O noso compromiso co sistema galego de ensino superior neste procedemento foi inequívoco”, reivindican. Así as cousas, a UDC considera roto o acordo, polo que dará continuidade ao impulso da súa titulación en Medicina. “Desde o inicio consideramos –esta medida– como a mellor opción para dar resposta á demanda existente e avanzar nun novo modelo formativo”, conclúen.
