O xoves, 27 de febreiro de 2025, foi un día moi especial no IES Miraflores xa que deron comezo as celebracións polo seu 25 aniversario. Os actos contaron coa presenza do Inspector do centro, Juan Carlos Varela, dos dous ex directores, Andrés Gabín e Paula Medín, así como de alumnado e profesorado que forman parte da historia do centro, ademais de representantes do Consello Escolar e do Concello de Oleiros.
A xornada comezou cunha mesa redonda con seis exs alumnos e alumnas que, actualmente, exercen con éxito a súa profesión en distintos ámbitos como o xornalismo, a informática, a docencia, a radioterapia ou como autónomo. O alumnado de 2º de Bacharelato puido gozar das súas vivencias e recibir valiosos consellos de cara á PAU e á súa incorporación ao mundo laboral. Ademais, os poñentes compartiron o orgullo de levar consigo, no seu día a día, a formación académica e en valores adquirida no centro, así como moitas amizades forxadas nel.
A continuación, e xa no exterior, as palabras dos distintos representantes tinguiron o momento dunha gran emotividade. O clímax da xornada chegou cando a profesora de Latín e Grego hasta o curso 2024, Susana de Lorenzo, interpretou o himno galego mentres se procedía á instalación dunha placa conmemorativa e á plantación dunha árbore cargada de simbolismo: un teixo de 25 anos! Esta árbore, venerada polos pobos celtas, era considerada un símbolo da vida eterna debido á súa gran lonxevidade que lle confería un carácter case inmortal.
Ao mesmo tempo, procedeuse a enterrar unha cápsula do tempo que contiña, entre outros obxectos, un xornal do día, as orlas de todas as promocións tituladas (incluída a do presente curso), unha estreliña en recordo da actividade solidaria con Valencia tras o desastre provocado pola DANA, unha playlist coas cancións máis populares do momento, unha chapa de Rosalía de Castro e redaccións do noso alumnado sobre como imaxinan o centro dentro de 25 anos ou os avances que cren que se poderían producir nese período.
