A Xunta de Galicia e a Universidade da Coruña (UDC) acordou a creación dun grupo de traballo para avanzar nunha proposta de medidas que permitan “emendar” a situación financeira na que se atopa a institución académica e elaborar un plan de equilibrio financeiro como paso previo ao orzamento de 2026. Así o acordaron nunha reunión en Santiago os conselleiros de Educación, Ciencia, Universidades e FP, Román Rodríguez, e de Facenda, Miguel Corgos, xunto ao reitor da UDC, Ricardo Cao, acompañado do seu equipo reitoral.

No encontro, informa a Xunta, abordouse “a necesidade de buscar unha solución á situación sobrevinda de desequilibrio contable na que actualmente se atopa a universidade e que se puxo de manifesto polo actual equipo de goberno coa liquidación do ano 2023“. Agora, un equipo de traballo formado por técnicos da Consellería de Facenda, a Secretaría Xeral de Universidades e da UDC “traballarán co obxectivo de emendar a situación herdada”. “A partir de aí, deseñarase un plan plurianual no que se fixe a senda de reequilibrio financeiro encamiñado a canalizar a senda orzamentaria e, desta maneira, garantir a estabilidade económica da UDC”, engade.