A Universidade da Coruña (UDC) traballa na creación dun xemelgo dixital para optimizar o seguimento e a radioterapia no cancro de próstata. Segundo informa a institución académica, este proxecto, dirixido polo investigador Guillermo Lorenzo Gómez, do Grupo de Métodos Numéricos en Enxeñaría (GMNI) do Centro de Innovación Tecnolóxica en Edificación e Enxeñaría Civil (CITEEC), avanza na execución desta iniciativa baseada en previsións computacionais personalizadas “que permitan predicir como avanzará a enfermidade, podendo axudar así na toma de decisións no tratamento”.

A UDC lembra que a oncoloxía computacional estuda modelos biomatemáticos e métodos computacionais para describir e predicir o crecemento de tumores e a súa resposta aos diversos tratamentos. “Todo isto, coa finalidade de entender mellor a bioloxía do cancro, descubrir novas formas de controlar e combater a enfermidade, e optimizar a atención clínica mediante predicións personalizadas da progresión de cada paciente“.

Neste contexto enmárcase o proxecto de investigación en oncoloxía computacional aplicado a cancro de próstata (PCATWIN) que desenvolve Lorenzo. Trátase, apunta, dun traballo realizado en colaboración cun equipo internacional e multidisciplinar, que inclúe persoal investigador e médico de España, Italia, Países Baixos, Reino Unido e Estados Unidos.