Atento comunicou o pasado venres aos traballadores da quenda de noite a súa decisión de cesar no centro de traballo de Juan Flórez e, en consecuencia, de implantar cambios substanciais nas condicións laborais de máis de 20 compañeiros, segundo denuncia a CGT.
Para o sindicato, que leva anos liderando a loita contra o proceso de deslocalización da súa estrurura e de destrución de emprego no país, “esta medida, ademais de dificultar a conciliación da vida laboral e persoal, supón unha perda económica (polas bonificacións que se pagan nas quendas nocturnas) e afecta aos traballadores que, nalgúns casos, levan case 25 anos traballando en quendas nocturnas, cunhas 25 horas semanais semanais, e cuxo salario colectivo acaba de ser superado polo salario mínimo”.
Denuncian que “moitos compañeiros veranse obrigados a abandonar o seu posto de traballo por non poder aceptar o novo horario asignado unilateralmente pola empresa”.
“Atento, en connivencia co seu cliente Telefónica, está a aplicar esta medida motivada exclusivamente pola súa mesquindade e cobiza, para seguir aumentando os seus beneficios a costa dos que traballamos para ela e sen importarlle o máis mínimo a nosa vida, externalizando a quenda de noite do servizo de asistencia técnica de Movistar (línea de axuda número 1002) a Colombia, onde os traballadores xa teñen peores condicións de traballo no sector de Contact Center”, denuncia a CGT.
Máis novas
As traballadoras de ABAI volveron concentrarse ás portas da tenda de Movistar
