Tralas alegacións respaldadas por máis de 5.800 presentadas pola veciñanza do barrio, tanto a plataforma Defensa do Común como o BNG veñen de presentar sendas alegacións á modificación puntual do PXOM Parque da Agra.
A entidade veciñal pide que se proceda a unha nova proposta “coa idea de garantir o gran Parque, unha reivindicación longamente anhelada pola veciñanza desta populosa barriada coruñesa”. Amosan a “súa convicción de que a maioría dos bloques de edificios de carácter residencial contemplados na proposta (B,C,D, E) previstos para o POL M22, deben ser suprimidos e cualificados como zona verde pública en orde a dotar ao barrio do gran Parque do Agra porque a veciñanza non pode seguir sendo a vítima da especulación”.
Finalmente, Defensa do Común saúda a posición firme da asociación veciñal que nunca abdicou do seu gran proxecto de dispoñer dun gran Parque e que, ao tempo, permitiulle contaxiar esa demanda ao conxunto do barrio.
O BNG
En paralelo, a portavoz do BNG no Concello e candidata nacionalista á Alcaldía, Avia Veira, rexistrou a alegacións o pasado venres, após comprobar que durante a tramitación da modificación puntual do PXOM o Goberno Local “lle ocultou información relevante”. A clave, explicou, radica na sentenza en relación ao soar das Adoratrices. “Nas distintas fases da tramitación, tanto da modificación puntual como do convenio asinado polo Concello co propietario desa parcela, o Goberno Local deu a entender que, en aplicación do fallo do tribunal, os usos dese solo eran necesariamente residenciais”. Pero en realidade non é así”, sinalan tras “descubrir que por efecto da sentenza ao soar das Adoratrices volvíalle ser de aplicación o PXOM de 1998 e non o de 2013. Tanto a lexislación como a xurisprudencia sinalan que cando se anula total ou parcialmente un plan [o de 2013] entra en vigor o planeamento anterior, isto é, o de 1998”.
O Concello ten a facultade de mudar o uso para residencial, mais iso esixe un proceso que non se levou a cabo. “Debería partirse, pois, do que establecía o PXOM de 1998”, alegou Veira.
Reducir a edificabiilidade, aumentar a zona verde
Alén da cuestión do soar das Adoratrices, as alegacións do BNG van na dirección de reducir a edificabilidade e, por tanto, aumentar a zona verde do Parque.
En concreto, o BNG pide eliminar os volumes denominados B, C, D e E, a cesión da edificabilidade que lle corresponde á Axencia de Meteoroloxía e a obtención -vía expropiación ou por medio doutro dos mecanismos previstos na Lei do Solo- dos 3.500 metros cadrados que a propiedade do soar das Adoratrices estaba disposto a ceder.
Se foren atendidas as alegacións do BNG, o espazo libre alcanzaría os 15.463 metros cadrados, 22% máis do que se recolle na proposta de aprobación incial.
Sumar
Movemento Sumar Coruña presentou alegacións á Modificación Puntual no 27 do PXOM no ámbito do Parque do Agra, reclamando ao Concello que reconsidere a ordenación antes da súa aprobación definitiva e aproveite toda a marxe existente para conseguir o maior retorno colectivo posible para o barrio.
A formación lembra que a sentenza debe cumprirse, pero non configura por si mesma a ordenación concreta que agora se tramita: non establece volumetría, as alturas, a disposición do edificios nin a configuración dos edificios. Son decisións posteriores de planeamento que corresponden ao Concello e que deben estar xustificadas desde o interese xeral.
«Unha sentenza resolve un conflito xurídico, pero non decide como debe ser o Parque do Agra. Esa responsabilidade segue sendo do Concello e debe exercerse pensando primeiro nas necesidades do barrio», afirma Trinidad Palacios, voceira de Movemento Sumar Coruña.
