A cidade da Coruña converterase esta primavera e verán nun dos principais focos musicais do país grazas ao regreso dos Concertos do Xacobeo, un ciclo impulsado por Turismo de Galicia que traerá a artistas de proxección internacional como Lenny Kravitz, Alanis Morissette, Lionel Richie, Paloma San Basilio ou Chayanne.

A programación dará comezo o 10 de abril co directo de Lenny Kravitz, que presentará o seu novo espectáculo ‘Blue Electric Light Tour’ no Coliseum. Estará acompañado pola artista convidada Estrella Morente, nunha actuación que marca a súa cuarta visita a Galicia.

En maio, o día 3, será a quenda da cantante Paloma San Basilio, que ofrecerá no Palacio da Ópera o seu concerto de despedida dos escenarios dentro da súa xira ‘Gracias Tour’, facendo un repaso polos seus temas máis coñecidos.

O 18 de maio, tamén no Coliseum, Chayanne regresará aos escenarios galegos tras máis dunha década, no marco da súa xira ‘Bailemos otra vez’, para a que as entradas se esgotaron en só seis horas cando saíron á venda en novembro.

No mes de xullo, o día 9, será Alanis Morissette quen actúe na cidade herculina, dentro do seu ‘Triple Moon Tour’, co que celebra unha carreira galardoada con sete premios Grammy. E o 31 de xullo, o artista Lionel Richie porá o broche á serie de actuacións internacionais co seu repertorio clásico no Coliseum.

Ademais destes concertos individuais, a Xunta confirma o seu apoio ao Morriña Festival, que terá lugar no porto da Coruña os días 25 e 26 de xullo, con artistas como Nathy Peluso, Residente, Ozuna, Jhayco, Mikel Izal ou Duncan Dhu, entre outros.

A través desta nova edición dos Concertos do Xacobeo, o Goberno galego busca consolidar Galicia como destino cultural de referencia, apostando por unha oferta musical que combina nomes consolidados e novos talentos.