A alcaldesa da Coruña, Inés Rey, pediu que “non se obstaculice” a petición de declaración de zona tensionada da cidade, ao ser preguntada por esta cuestión e o procedemento impulsado desde o consistorio. En declaracións aos xornalistas, insistiu en que a vivenda é un tema “crucial” e a “maior preocupación” dos cidadáns. “A declaración, desde o meu punto de visita, ten máis cousas positivas que negativas”, dixo mostrándose confiada en que saia adiante. Mentres, nesta materia instou a “algunhas forzas políticas” a aplicar “máis pedagoxía e menos demagoxia” e a non “terxiversar o que di a lei”, en relación a argumentos centrados en ocupacións de vivendas. “Non contribúen a crear clima de seguridade”, sentenciou.