Este luns pola mañá renovouse a procura do home que caeu ao mar este domingo, na zona da Torre de Hércules, na Coruña, con efectivos por terra e mar, segundo informaron fontes do 112 Galicia e de Salvamento.
Así, os labores de rastrexo puxéronse en marcha con efectivos de Protección Civil e Policía en terra, e tamén están a participar os bombeiros por mar. Igualmente, atópase na zona a embarcación Salvamar Betelgeuse, e non se descarta a participación do helicóptero Helimer no dispotivo, en función das condicións meteorolóxicas. O home precipitouse ao mar sobre as 13.10 horas deste domingo e un particular alertou a Emerxencias, informando de que o home fora arrastrado por unha onda mentres sacaba unha foto. As roupas desta persoa foron localizadas no mar.
INÉS REY FAI UN CHAMAMENTO Á RESPONSABILIDADE
A alcaldesa da Coruña, Inés Rey, chamou á responsabilidade e a seguir as recomendacións ante previsións de mal tempo e forte ondada. A preguntas dos xornalistas, apelou “á prudencia, á sensatez e a non pór en perigo a propia vida nin de quen nos axudan”. “Espero que este suceso tan terrible sirva para concienciarnos para seguir as indicacións das forzas e corpos de seguridade”, insistiu.
Respecto diso, recalcou que se trata dunha “auténtica irresponsabilidade e inconsciencia” achegarse ao mar para facerse “un selfie” nun momento no que están activadas “diferentes alertas” polas inclemencias meteorolóxicas. “Córrese o risco certo de caer o mar en zonas de difícil acceso e con moitas dificultades para saír”, explicou para confirmar que a procura desta persoa “renovouse”. “Pero diría que con ningunha esperanza de atopalo con vida“, lamentou.
Buscan a un home que caeu ao mar na contorna da Torre de Hércules
