Hoxe luns 31 de marzo, hai case 40 concentracións en todo o país para volver a denunciar que Galicia está radicalmente en contra do xenocidio que o estado sionista de Israel está realizando sobre o pobo palestino. Se ben a cita central será en Compostela, cunha megaxuntanza do colectivo cultural de todo o país, A Coruña tamén demostrará o seu compromiso ás 20:00h, coma sempre, no Obelisco.
Pero é que onte, 30 de marzo, é o Día da Terra Palestina, onde se conmemora a folga xeral de 1976 contra o roubo de territorios palestinos. Nesta data, o pobo palestino denuncia a limpeza étnica, o roubo de terras e o estado de Apartheid no que vive desde hai décadas, baixo a ocupación do estado sionista.
Así o fixo onte unha delegación do colectivo Pararlaguerra, cunha concentración no Obelisco, que serve para quecer motores para a megaconcentración desta tarde. Lembraron que dende Netanyahu rompeu o alto o fogo, o exército israelí xa matou a máis de 400 civís, a maioría mulleres e nenos, sendo xa máis de 50.000 persoas asasinadas en Gaza dende o comezo do xenocidio.
E fíxoo co apoio explícito de Trump, que tamén tivo a vileza de facer un vídeo e envialo por todo o mundo anunciando que quere expulsar aos habitantes de Gaza para converter Gaza nun centro turístico, a “Riviera de Oriente Medio”.
O colectivo Pararlaguerra, formado por máis de 100 organizacións e milleiros de profesionais, considera que “é hora de que toda a poboación —profesionais, intelectuais, activistas, organizacións e cidadáns de todo o país— se una e berre “Alto a masacre da poboación palestina”.
Máis novas
Mohamed Safa: ”Non queremos unha loita étnica, isto é unha guerra anticolonialista”
