Representantes de CIG-Administración Pública concentráronse este xoves ante a dirección provincial do Servizo Público de Emprego (SEPE) na Coruña por, denunciaron, “a situación de colapso na que se atopa o organismo pola alarmante falta de persoal e a implantación dunha nova aplicación ineficaz para tramitar as prestacións”.

Con esta protesta, que se repetirá nos próximos días no resto de direccións provinciais, o sindicato esixe tamén a dimisión do director xeral do Servizo Público de Emprego Estatal “polo seu inacción á hora de atopar solucións”.

En Galicia, explicou o representante de CIG no SEPE, Xulio Igrexas, hai 155 prazas vacantes, polo que “o traballo que tería que facer ese persoal asúmeno os 600 traballadores que ten o SEPE”.

Este déficit, segundo esta representación sindical, “impide afrontar o volume de traballo en condicións dignas, obriga aos traballadores a asumir unha carga de traballo extenuante para cumprir os prazos e impídelles ofrecer un servizo de calidade aos cidadáns”.