O cantante Marc Anthony actuará o próximo 13 de xullo na Coruña dentro dos concertos do Xacobeo, segundo informaron o director de Turismo de Galicia, Xosé Merelles, e o concelleiro de Cultura e Turismo, Gonzalo Castro. “É unha oferta complementaria da cidade no verán, antesala das festas de María Pita“, manifestou, na presentación, Xosé Merelles que destacou a colaboración institucional co Concello herculino e a Autoridade Portuaria.

Pola súa banda, o edil de Cultura do Concello da Coruña, Gonzalo Castro, indicou que será outro evento “de gran nivel” tras a presenza de Luís Miguel ou Lenny Kravitz. Por outra banda, remarcou a colaboración institucional da que, dixo, “pon en valor a capacidade de Galicia para converterse nunha referente internacional na realización de grandes eventos”.

As entradas sairán á venda o xoves, día 24, para un aforamento de 15.000 persoas nunha actuación no peirao de Batería e na que o artista presentará na cidade a súa xira mundial ‘En Vivo’, coa que celebra máis de tres décadas de éxitos. Na súa anterior visita á cidade herculina, en 2016, esgotou as entradas en só 48 horas. En 2022, no Monte de Gozo, 16.000 persoas asistiron á súa xira ‘World Tour’.