Este sábado día 26 de abril ás 19:30h, músicos como Manuel Silveira (fundador de Zënzar e 12 Labirinto), Xosé Bocixa (vocalista de Zënzar), Gonzalo Grela (actual membro da banda Broa), Antón Díaz (baixista dos Papaqueixos), Xurxo Souto e Laura Romero (baixista de Zënzar e autora do libro A culpa foi de Zënzar) faranlle homenaxe a histórico músico Tito Calviño. Será no espazo Portas Ártabras (rúa Sinagoga, 22, A Coruña), onde non faltará o seu fillo, de mesmo nome e profesión.
A proposta nace a carón do libro A culpa foi de Zënzar, unha obra que recolle os máis de 35 anos de historia da banda de Cerceda e que festexa a cifra cun libro ilustrado da man da súa baixista, a ilustradora ordense Laura Romero.
Ao longo das súas 346 páxinas e cun estilo propio e fanzineiro, a publicación mestura narración con moita conversa (na que participou medio centenar de persoas), ilustracións e documentos gráficos como fotografías, entradas e carteis, sendo un libro clave para entender o papel que xogou Cerceda (e concellos lindeiros coma Ordes ou Carral e ata A Coruña e Compostela) na historia do rock e punk galegos.
Que mellor que celebralo cunha presentación homenaxe dirixida por Xusto Souto.
