O Concello da Coruña celebrou este venres na praza de María Pita o seu acto institucional polo Día das Letras Galegas, que este ano a Real Academia Galega dedica ás cantareiras como símbolo da transmisión oral da lingua e da identidade colectiva. O evento estivo presidido pola alcaldesa Inés Rei, que destacou o papel destas mulleres como “gardianas da memoria musical e cultural de Galicia”.

A homenaxe centrouse en sete figuras femininas cunha ligazón directa coa cidade: Adolfina Casás, Rosa Casás, Eva Castiñeira, Manuela Lema, Teresa García, Prudencia Garrido e Asunción Garrido, todas recoñecidas como referentes da tradición oral a través da súa participación en grupos de música popular e o uso da pandeireta e o canto como vehículo de transmisión xeracional.

No acto participaron familiares das homenaxeadas, así como representantes do tecido cultural e asociativo coruñés, membros da corporación municipal e representantes doutras institucións. A rexedora subliñou que o Concello quixo antecipar a celebración da xornada festiva “con este recoñecemento a mulleres que, durante xeracións, foron transmisoras da cultura popular, da lingua e da historia colectiva a través da música”.

O evento institucional insírese nas actividades organizadas pola cidade da Coruña para conmemorar esta festividade dedicada, nesta edición, a visibilizar o papel da muller na música tradicional galega, en sintonía coa proposta da RAG de recoñecer unha representación colectiva da poesía oral popular.