112 obras serán proxectadas procedentes de 15 países, e das que 33 son estreas mundiais e 20 pezas de autoría galega; con 97 cineastas participantes; 6 film performances, 4 sedes (Palexco, Filmoteca de Galicia, Fundación Luis Seoane e Domus); 5 actividades paralelas…
Todo isto é a (S8) Mostra de Cinema Periférico que volverá converter a cidade da Coruña na capital mundial do cinema de vangarda, que se desenvolverá do 3 e o 8 de xuño.
A 6ª edición do festival, presentada onte na Domus, traerá nomes como o venezolano Carlos Castillo, a estadounidense Betzy Bromberg, a chilena Jeannette Muñoz ou a arxentina Daniela Cugliandolo.
A cota ten un volcán evocador da forza da creación como imaxe principal, e precisamente a sesión inaugural será un percorrido por películas icónicas de EEUU, Xapón, Austria, Italia e Francia realizados entre 1923 e 2023 e que teñen os volcáns como inspiración.
Grandes nomes e retrospectivas
Este 2025 cúmprense sesenta anos da aparición do formato Súper 8, que lle dá nome ao festival e ao que se homenaxea por favorecer a liberdade nos primeiros pasos de creadores e cineastas hoxe mundialmente recoñecidos. É o caso do venezolano Carlos Castillo, quen participou coas súas películas en Súper 8 no Festival de Cannes en 1981 e terá na Coruña a primeira retrospectiva da súa obra en Europa. Tamén ofrecerá aquí unha masterclass sobre a historia do cinema de vangarda en Venezuela.
Actividades paralelas
A formación e impulso da arte cinematográfica terá o seu espazo en varias actividades previas e durante o festival. O pasado 13 de maio iniciáronse as proxeccións para escolares, polas que pasarán máis de trescentos alumnos e alumnas de entre 8 e 15 anos de varios centros educativos da Coruña. Son catro sesións (13, 20 e 27 de maio e 2 de xuño) que se realizan na Domus e supoñen unha oportunidade para que a xente máis nova descubra o celuloide e a gran diversidade que existe nas formas de facer cinema.
Este ano, ademais, coñecerán o traballo de dous cineastas galegos: Iago Lourido e Xacio Baño, cos que manterán un coloquio tras as proxeccións.
Dentro da oferta educativa da Mostra destaca o taller de inclusión social Xpresa, que se levará a cabo o 30 e 31 de maio na Fundación Luis Seoane e está realizado co apoio da Fundación Emalcsa e o seu programa Cultura Accesible e Inclusiva. Baixo o título “Ritmos de luz, cine sin cámara para la inclusión”, está dirixido pola artista visual Deneb Martos e nel participan persoas usuarias das fundacións Adcor e Asperga.
Xa durante o festival haberá un novo encontro, Paraíso, que convoca estudantes de Belas Artes de diferentes lugares de España. Este ano repiten a Universidade de Vigo e a Universidade de Salamanca, e súmase por vez primeira a Universidade Complutense de Madrid.
