A Asociación Aspace alertou dun timo na Coruña por parte dun home maior que pide doazóns para esta entidade en visitas a domicilios. Así o informa tras recibir o aviso dunha cidadá da Coruña que alertou do timo por parte dun home que pide diñeiro a favor da asociación e as persoas con parálise cerebral que atende. Segundo a información facilitada, “é un home maior, cun problema nun ollo, que di ir en representación da asociación pola zona de Monte Alto e descoñecemos se por outros barrios da Coruña”, engade Aspace.

“A entidade non ten a ninguén, nin persoal asalariado nin voluntarios ou voluntarias pedindo diñeiro polas casas e todas as persoas que queren colaborar fano mediante unha transferencia ou domiciliación bancaria”, remarca a asociación. A entidade, con case 50 anos de traxectoria a favor das persoas con parálise cerebral e as súas familias, denuncia “este timo que non representa os valores da entidade” e mostra a súa repulsa cara a este tipo de prácticas “utilizando o bo nome da asociación e a situación de vulnerabilidade das persoas que atende para aproveitarse da solidariedade cidadá”.