O Partido Animalista PACMA denunciou publicamente a “morte evitable” de polo menos dous gatos recén nados nunha nave industrial do polígono da Grela, onde quedaron atrapados a mediados do mes de maio, tras acceder a nai para parir. Apuntan que, a pesar das múltiples chamadas de petición de auxilio ao escoitar os maullidos dos animais, ningunha administración nin o corpo de bombeiros actuou.

A Policía Local da Coruña localizou a residencia do propietario da nave, en Betanzos, pero negouse a intervir ao tratarse dunha propiedade privada e non lograr establecer contacto con el. A Policía Local de Betanzos, pola súa banda, acudiu ao seu domicilio sen éxito. Nin os axentes nin os bombeiros accederon á nave nin se achegaron ao lugar, o cal derivou no falecemento de todos os animais que había no seu interior.

Finalmente, foi a propia coordinadora provincial de PACMA na Coruña, Manuela García, e varios particulares, quen logrou localizar ao propietario coa axuda de empregados dunha gasolineira próxima. Cando este accedeu á nave, varios días despois do peche, os animais xa faleceran cuns días de diferenza.

Desde PACMA cualifícase esta situación como un fallo nos protocolos de actuación en caso de emerxencia e unha mostra de como a protección animal segue sen ser prioridade para as administracións. “Nin sequera se valoraron alternativas de acceso nin houbo interese real en solucionar a situación a pesar da agonía. O que ocorreu é inadmisible, carente de ética e pedimos responsabilidades”, sostén a coordinadora.