Despois de varios meses de polémica entre a Xunta e o Concello, a propósito do singular sistema de reciclaxe da nosa cidade (ao contrario que o resto de Galicia, ao termos a planta de Nostián o contedor verde/marrón foi empregado só para orgánico, pero non para a fracción resto, como no resto do país), a cidade da Coruña instalará este ano o quinto colector para facilitar a recollida selectiva de residuos.
Con iso o que son envases lixeiros, como plásticos, latas e bricks, deberán depositarse no colector amarelo mentres que no gris irá todo aquilo que sexa fracción de resto, desde cueiros e compresas ata cepillos de dentes ou obxectos de cerámica, entre outros.
Así queda pois a recollida por colores:
- Marrón: materia orgánica,
- Amarelo: envases lixeiros,
- Azul: papel e cartón,
- Verde: vidro
- Gris: fracción de resto.
A implantación do quinto colector farase en virtude do protocolo de colaboración subscrito este venres pola alcaldesa, Inés Rey, e a conselleira de Medio Ambiente, Ángelez Vázquez, mediante o cal a cidade herculina sumar ao acordo con Ecoembes para facilitar que se poidan separar adecuadamente os envases lixeiros.
“Con este convenio pechamos un círculo”, sentenciou a conselleira en relación ao cumprimento con iso da normativa estatal na cidade herculina no que se refire a envases lixeiros. Ademais, explicou que haberá unha comisión de seguimento para que se implante o quinto colector ou os que hai agora mesmo poidan facer tamén esa función.
Desta forma, haberá recollida separada de bricks, envases e plásticos, ademais de orgánica, fracción de resto e papel e vidro. “En Galicia, a recollida selectiva de envases lixeiros é dun 52% hai que chegar este ano ao 65%, e coa adhesión da Coruña imos cumprir os obxectivos marcados pola UE”, apuntou.
