A alcaldesa da Coruña Inés Rey, presidiu este venres o acto conmemorativo polo 40 aniversario da apertura da Casa das Ciencias, o primeiro dos Museos Científicos Coruñeses. “Neste día celebramos o pasado, pero tamén escribimos o futuro no que seguiremos apostando pola ciencia, pola educación e por unha Coruña con ambición e coñecemento”, expuxo.
Foi nun acto celebrado no exterior da Casa das Ciencias e no que participaron tamén o director dos Museos Científicos Coruñeses, Marcos Pérez, catro mulleres científicas (Cristina Naya, Branca Fernández, Hervilia Seco e Socorro Castro) e alumnado, entre outros representantes.
Durante o acto, os nenos e nenas participantes encheron unhas fichas que, posteriormente, introduciron nunha cápsula do tempo que será aberta por esas mesmas persoas na celebración do 50 aniversario, en 2035. Todo iso cunha proxección especial tamén no planetario.
