Cansada está a veciñanza de Celas, en Culleredo, por ter que xogarse a vida cada vez que saen de casa andando. Porque a AC-400, que atravesa os núcleos de poboación das parroquias de Sésamo e Celas, aínda que pareza mentira, aínda carece dunha zona de paso a pé, privando ós veciños e veciñas de poder desprazarnos diariamente con seguridade.

Levan tempo protestando e xa fai un tempo, e tras ver que as peticións individuais non tiñan efecto, decidiron facer unha recollida de sinaturas nos comercios, centros sociais e locais de Celas para poder presentar unha solicitude formal conxunta na Axencia Galega de Infraestruturas, a titular da estrada, na que solicitaban a construción dunha beirarrúa, ou senda peonil, na estrada.

”Recollemos case 400 sinaturas (377 en total), un número que representa unha porcentaxe elevada respecto ó número de veciños e veciñas da parroquia”, explícanos Xiana Vázquez Formoso, veciña da parroquia. Esta mesma semana presentaron as sinaturas no Rexistro do edificio administrativo de Monelos á atención do servizo provincial da Coruña da AXI.

Por agora, “Concello e AXI pasan a responsabilidade duns a outros e, a día de hoxe, seguimos esperando”, lamenta Vázquez, que pon de exemplo outros concellos como o de Cerceda que xestionou a titularidade dos tramos desta mesma estrada para facer as beirarrúa.