Axentes do Corpo Nacional de Policía e da Policía Local puxeron en marcha un dispositivo conxunto na Coruña para incrementar o control sobre o consumo de alcol en menores e tamén o seu acceso a locais de lecer sen estar permitido.

Segundo informa a Policía Nacional, coa finalización do curso escolar e a chegada do período estival “prevense maiores concentracións de persoas nos locais de lecer e en determinadas zonas da cidade”. Neste contexto, lembra que os mozos poden ser “especialmente vulnerables ao consumo de alcol“, que ademais “pode ir acompañado doutros riscos”, como accidentes, exposición á violencia ou o contacto con sustancias ilegais.

Por iso, incide en que se fai “necesario” configurar espazos “seguros”, posibilitando a actividade de lecer e diversión nunha “contorna saudable de convivencia e garantir a seguridade das persoas que gocen do lecer na Coruña”. Con este obxectivo, “implementaranse medidas para erradicar a súa venda a menores, o seu consumo nos espazos públicos e especialmente, o acceso de menores a locais de lecer nocturno” que, por lei, “non están autorizados a permitir a súa entrada”.