Día emocionante o vivido o sábado en Borobás. Tiña lugar a entrega dos premios da XL edición do Premio Antón Losada Diéguez, convocado polos concellos de Boborás e O Carballiño, co patrocinio da Deputación de Ourense. E as pequenas pezas escultóricas, e os 6.000€ de premio, recaeron en dous herculinos: Alberto Pombo e Manuel Rivas. Os seus traballos foron escollidos como os mellores de 2024 polo xurado, constituído por membros dos Concellos, pero tamén da RAG, das tres Universidades galegas e da Deputación ourensá.
Especial foi o finde do mestre Alberto Pombo. Tralo éxito (e o choio) do Festival Aquí tamén se fala celebrado na tarde-noite do venres, madrugaba o sábado para achegarse a Borobás, para recoller o premio modalidade de Investigación e Ensaio pola súa obra Verso e acorde. Relacións entre literatura galega e música pop (1950-2000), publicada por Edicións Xerais e que parte dunha documentada tese de doutoramento que trae á luz a relación entre a música popular (pop, rock, punk, heavy metal, bravú, música infantil) e a literatura galega.
O xurado sinalou a contribución ao coñecemento da «outra música» e destacou o tratamento da abordaxe histórica coa nova metodoloxía dos estudos culturais argumentando que: «Desprega ante o público lector a obra dunha xeración que soubo arrequecer o panorama musical do século XX desde o compromiso coa cultura de noso».
O de Arteixo, afónico polo festival pangalaico, contou como anécdota que de pequeno non era un gran lector, pero en 3º ESO, Sechu Sende e Henrique Rabuñal chegaron a clase cun libro de Manlo Rivas e “os meus pais puideron celebrar esa vitoria de que o seu fillo por fin quería ler”. Pombo viaxou ao Mozambique dos anos 50 para viaxar ás orixes da música pop galega, e recordou o analfabetismo da súa propia avoa, para agradecer os esforzos da súa familia.
Manolo Rivas
No caso de Manolo Rivas, flamante premio nacional de literatura, e recentemente recoñecido como Coruñés do Ano polo Circo de Artesáns, o xurado distinguiu a súa última novela, Tras do Ceo, de Edicións Xerais, como gañadora da modalidade de Creación Literaria, destacando a calidade literaria e lingüística dunha obra que, recuperando elementos xa clásicos na produción do autor, constrúe un universo narrativo absolutamente actual e pon o foco no choque entre a natureza e unha civilización que se revela como destrutora do hábitat que nos fai seres humanos.
Recoñeceron que o escritor «manexa con suma habelencia unha progresiva tensión narrativa» a partir de escenas marcadas pola desigualdade, a explotación, a violencia e a destrución, co obxectivo de provocar a reflexión no lector e de penetrar nas emocións e sentimentos máis profundos, aqueles que resultan difíciles de expresar con palabras.
Máis novas
Alberto Pombo e Manuel Rivas comparten o Premio Losada Diéguez
Alberto Pombo teceu pontes na Barbería entre a música pop e a literaruta galega
