A praza de María Pita, na Coruña, acolleu esta tarde unha concentración convocada polo consistorio coruñés en repulsa polo asasinato acontecido onte na Sagrada Familia, presuntamente a mans da súa parella.
Na concentración, gardáronse varios minutos de silencio e expresouse, con pancartas, a condena á violencia de xénero. “Consternados por este brutal asasinato”, asegurou, aos medios de comunicación, a rexedora, quen apostilou que “loitar” contra estes crimes debe “involucrar a todos”. “Nin unha menos, vivas querémonos”, berraron as mullers na concentración.
A vítima recibiu, segundo informou este luns a subdelegada do Goberno na Coruña, María Rivas, ducias de puñaladas con “bastante enseñamiento”.
View this post on Instagram
O home foi o que confesou á súa exmuller– coa que ten dous fillos en común — “que acababa de matar á súa parella actual” e foi ela quen avisou a Emerxencias.
Tras personarse a Policía Nacional no domicilio no que convivían, procedeuse á detención do presunto agresor e localizouse o coitelo.
A falecida estaba incorporada no sistema VioGén con motivo dunha agresión física rexistrada en setembro de 2024. Nese momento, explicou a subdelegada do Goberno, aplicouse o Protocolo Cero, activado para actuar de oficio “cando as vítimas non se deciden a denunciar nun contexto de espiral de violencia de xénero”.
Esta agresión derivou en procedemento xudicial que o pasado 27 de maio concluíu cunha sentenza “condenatoria” para o home que incluía unha “pena de afastamento en fase de execución”. O detido, de 61 anos, orixe peruana e nacionalidade española e a vítima — de 49 anos e peruana — contraeron matrimonio en maio.
Máis novas do caso
A muller asasinada na Sagrada Familia pola súa parella estaba no sistema VioGén
