A Xunta mostrou a súa sorpresa ante as declaracións da alcaldesa da Coruña, a socialista Inés Rey, “por tentar responsabilizar á Administración autonómica de cuestións referidas a os vehículos de turismo con condutor (VTC) que son de estrita competencia municipal”.

Ante as afirmacións da rexedora, denunciando “inacción” da Administración autonómica e reclamando coordinación nesta materia, o conselleiro de Presidencia, Xustiza e Deportes, Diego Calvo, animou á rexedora que “como máxima responsable municipal, tome as decisións que considere oportunas na cidade respecto das VTC e póñase a traballar para regular no ámbito municipal”.

“Deixando ao carón a confrontación coa Administración autonómica”, indica o conselleiro que indica que a Xunta tramita as autorizacións de licenzas de VTC domiciliadas na comunidade autónoma, por delegación de competencias do Estado.

“As licenzas teñen carácter autonómico e interurbano, non habilitan para facer recorridos urbanos, pero permiten operar en todo o territorio galego sempre facendo traxectos entre diferentes municipios”, sinala para insistir, entre outras cuestións, en que as competencias sancionadoras no ámbito urbano corresponde aos consistorios.