A alcaldesa da Coruña, Inés Rey, denunciou “inacción” da Xunta e apelou á “coordinación” ante a implantación da plataforma de mobilidade estadounidense Uber na cidade. A preguntas dos xornalistas sobre este asunto, a rexedora recalcou que a normativa se atopa nun “período transitorio”. “A ordenanza de mobilidade está aprobada provisionalmente” e “en fase de alegacións”, explicou para engadir que unha vez que sexa definitiva estes vehículos “terán que solicitar a autorización correspondente”.

Neste sentido, lamentou que o Goberno autonómico “deixe o tema en mans dos concellos”. “Como sempre, pasa a pataca quente ás administracións locais e lávase as mans en todos os asuntos que requiran unha mínima complexidade”. “Estamos todas as cidades galegas igual, sen regulación específica para iso”, denunciou e apelou á “coordinación” para “ter todos unha regulación harmonizada, que sería o lóxico”.

A rexedora fixo estas declaracións na rolda de prensa convocada para dar conta dos asuntos tratados na Xunta de Goberno. Na mesma, aprobaron a saída a concurso das obras de rehabilitación do antigo mercado de Santa Lucía, unha actuación que suporá un investimento total de 10,3 millóns de euros e que aparella a construción dun novo centro de saúde e dun centro cívico, entre outros equipamentos públicos. Ademais, licitaron as obras de urbanización da praza José María Hernansáez, no barrio do Castrillón.